അടിയാത്തി

അടിയാത്തി

--ഷിധി കണ്ടാണശ്‌ശേരി

നെഞ്ചുപിളര്‍ന്നുകൊണ്ടുച്ചത്തില്‍ ഉച്ചത്തില്‍
അടിയാത്തിപ്പെണ്ണിന്റെ തേങ്ങലെത്തി-
പാവം,അടിയാത്തിപ്പെണ്ണിന്റെ തേങ്ങലെത്തി.
പതിയെപ്പറഞ്ഞും പതം പറഞ്ഞും
അലതല്ലിയൊഴുകുന്നാ കണ്ണുകളും
കാലന്റെ കയ്യൊന്നിടറിയ നേരത്തു
വെള്ളപുതപ്പിച്ചടിയാന്റെ ദേഹവും(2)
മരണവും ജന്മവും എന്തെന്നറിയാത്ത
പിഞ്ചുകുരുന്നുകളോടിയടുക്കുന്നു
ദേഹത്തിന്‍ ചുറ്റും വലംവെച്ചോടുന്നു
വെള്ള പുതപ്പു വലിച്ചു മാറ്റീടുന്നു
അച്‌ഛന്‍ ഒളിച്ചുകളിയ്ക്കയെന്നോതുന്നു
താതന്റെ നെഞ്ചോടൊട്ടിക്കിടക്കുന്നു
കണ്ണുകള്‍ മെല്ലെ പിച്ചിപ്പറിയ്ക്കുന്നു
കൂടേ കളിയ്ക്കാന്‍ വരികന്നോതുന്നു
ഈ കാഴ്ചകള്‍ കണ്ടു കരളു പിളര്‍ക്കുന്നു
എന്റെ,കരളു പിളര്‍ക്കുന്നു
അടിയാത്തിപ്പെണ്ണിന്റെ ബാല്യങ്ങളോര്‍ക്കുന്നു
ഞാന്‍,അടിയാത്തിപ്പെണ്ണിന്റെ ബാല്യങ്ങളോര്‍ക്കുന്നു.

താമിചെറുമനും കാളിചെറുമിയ്ക്കും
സീമന്തപുത്രിയാം കുഞ്ഞീയടിയാത്തി
ഞാറ്റു കണ്ടത്തിന്‍ ചാരത്തിലുണ്ടൊരു
സുന്ദരമാമൊരു കൊച്ചുകുടിലും
ആരും കൊതിച്ചുപോം സ്‌നേഹത്തിന്‍ കൊട്ടാരം
സുന്ദരമാമൊരു ശാന്തിതീരം
അതു, ചാമിചെറുമന്റെ ശാന്തിഗ്രാമം
ഞാനുമെന്‍ കൂട്ടരുമെന്നുമെത്തീടുന്നു
അടിയാത്തിപ്പെണ്ണിന്റെ വീട്ടുമുറ്റത്തും
കുറ്റിയും കോലും , കൊച്ചം കുത്തിയും
കണ്ണാരം പൊത്തിയും,കൊത്താംകല്ലാടിയും
നീക്കി ദിനങ്ങളും,സ്വര്‍ഗ്ഗത്തിലെന്നപോല്‍
ഇന്നത്തെ ബാല്യത്തിനന്യമായ്‌ തീര്‍ന്നൊരീ
ബാല്യസ്‌മരണകളോര്‍ത്തു പോകുന്നു ഞാന്‍

വസന്തവും ശിശിരവും വന്നുപോയി
കാലചക്രങ്ങള്‍ തിരിഞ്ഞുപോയി
വര്‍ഷങ്ങള്‍ എങ്ങോ മറഞ്ഞു പോയി
അടിയാത്തിപ്പെണ്ണു ഋതുമതിയായി
പെണ്‍മക്കളില്ലാത്ത എന്നമ്മയ്ക്കെന്നുമേ-
പൊന്നോമനയാണു കുഞ്ഞീയടിയാത്തി.
കൌമാരസ്‌നാനം കഴിഞ്ഞൊരു നേരത്തു
ബാല്യത്തില്‍ കണ്ടടിയാത്തിയല്ലല്ലോ?
കൊച്ചു കല്യാണത്തിനെന്നമ്മയേകിയ
പട്ടുപുടവയണിഞ്ഞവളെത്തി
പട്ടുപുടവയില്‍ വെട്ടിത്തിളങ്ങിയാ
കാഞ്ചന കാന്തിപോല്‍ കുഞ്ഞീയടിയാത്തി
കണങ്കാലുമുട്ടും മുടിയഴകുണ്ടല്ലോ
മാന്‍മിഴി വെല്ലും മിഴിയഴകുണ്ടല്ലോ
അഴകേറെയുള്ള നിതംബങ്ങളുണ്ടല്ലോ
എണ്ണക്കറുപ്പിന്റെ ഏഴഴകുണ്ടല്ലോ
എല്ലാം മറയ്ക്കും വിനയമുണ്ടല്ലോ
ആരും കൊതിച്ചുപോം സുന്ദരരൂപത്തെ
പരുന്തിനേ പേടിയ്ക്കും പിടക്കോഴിയെന്നപോല്‍
കാളിച്ചെറുമി ചിറകുവിരിച്ചു.
താമിചെറുമനും കാളിചെറുമിയു
മോഹങ്ങള്‍ ഓരോന്നു നെയ്‌തൊരുങ്ങി
ഒരായിരം മോഹങ്ങള്‍ നെയ്‌തൊരുങ്ങി
പറക്കമുറ്റാത്തൊരാ മോഹചിറകുകള്‍
വെട്ടിയരിഞ്ഞല്ലോ കാലന്റെ കൈകളും
ദീനം പെരുകി ഒരുനാളാഗ്രാമത്തില്‍
രാക്ഷസനൃത്തം ചവിട്ടി ദീനവും
അന്നേരമൊക്കെയും കാലനുമെത്തി
ഒറ്റയായ്‌ തീര്‍ന്നല്ലോ കുഞ്ഞീയടിയാത്തി
വിങ്ങി വിതുമ്പുന്നടിയാത്തി പെണ്ണിന്റെ
ചിത്രമിന്നോര്‍ക്കുന്നു ഇന്നലെയെന്നപോല്‍
ആരോരുമില്ലത്തടിയാത്തി പെണ്ണിനു
എന്നമ്മയെന്നും അഭയമേകി.

അശ്രു തുടയ്ക്കാന്‍ ഒരു ദിനമെത്തീ-
ദേവനെപോലെയടിയാ ചെറുക്കനും
വീട്ടിതടിയൊത്ത മേനിയുണ്ടേ
പ്രഭചൊരിയുന്നൊരാ വദനമുണ്ടേ
സ്‌നേഹം തുളുമ്പും മനമൊന്നുണ്ടേ
അടിയാത്തിപ്പെണ്ണിന്റെ മനം കുളിര്‍ത്തേ,
ആരോരുമില്ലാതെ ആര്‍ഭാടമില്ലാതെ
മംഗല്യമൊന്നു നടന്നു നീങ്ങി
എന്നമ്മ തന്നുടെ വദനത്തിലെങ്ങും
ശാന്തിതന്‍ മന്ത്രങ്ങള്‍ മുറ്റിനിന്നു
ഞാറ്റു കുടിലിലും രാഗമെത്തി-അതു
താളം പിടിച്ചു നൃത്തമാടി
ദിനങ്ങള്‍ പതുക്കെ മാഞ്ഞുപോയി
അടിയാത്തി പെണ്ണിനു നോവുമെത്തി
കടിഞ്ഞൂലു പെറ്റടിയാത്തിയന്നു
പിഞ്ചുകുരുന്നുകള്‍ രണ്ടുപേരെ
കോന്നനും ചേന്നനുമെന്നു പേരിട്ടവര്‍
സ്‌നേഹമാം പാലാഴിയൂട്ടി വളര്‍ത്തി
വേല കഴിഞ്ഞെത്തും താതന്റെ നെഞ്ചില്‍
കുരങ്ങു കളിയ്ക്കുന്നു ആന കളിയ്ക്കുന്നു
ആമോദമെങ്ങും തിരതല്ലിയല്ലോ
ഞാറ്റുകുടിലിലും ഉത്സവമായി.

വ്രതശുദ്ധിയോടെ വൃശ്ചികമെത്തി
വൃക്ഷ ശിഖരങ്ങള്‍ കാറ്റിലാടി
ഞാറ്റു കുടിലിലെ ഉത്സവം കണ്ടിട്ടു
ദേവകള്‍ക്കെല്ലാം അസൂയമൂത്തു
കാലന്നരികിലായ്‌ എത്തീയവരെല്ലാം
അടിയാത്തിപ്പെണ്ണിനു ദുര്‍വിധിയായ്‌
കാലമടുക്കാതെ നേരമടുക്കാതെ
കാലനന്നേരം കുഴങ്ങിയല്ലോ!
പോം വഴിയെത്തി വൃശ്ചികക്കാറ്റായ്‌
വൃശ്ചികകാറ്റും തകര്‍ത്തു വീശി
കറപുരളുന്ന തന്‍ കൈകളേ നോക്കീ
കാലന്റെ കണ്ണും നിറഞ്ഞുപോയോ
മുന്‍വിധിയൊന്നുമറിയാത്ത പാവം
അടിയാ ചെറുക്കനും വേലയ്ക്കിറങ്ങി
വേല ചെയ്‌തീടും അടിയാന്റെ മേനിയില്‍
വന്നു പതിച്ചല്ലോ വൃക്ഷശിഖരവും
അടിയേറ്റു വീണുപോയ്‌ അടിയാചെറുക്കനും
ഇരുട്ടു പരന്നല്ലോ ഞാറ്റുകുടിലിലും(2)

കരളു പിളര്‍ന്നിട്ടു വീണ്ടുമെത്തീടുന്നു
അടിയാത്തിപ്പെണ്ണിന്റെ തേങ്ങലുകള്‍
യാത്രയ്ക്കൊരുങ്ങും അടിയാന്റെ നെറ്റിയില്‍
ചുംബനം നല്‍കുന്നടിയാത്തിപ്പെണ്ണും
അന്ത്യചുംബനം നല്‍കുന്നടിയാത്തിപ്പെണ്ണും
ഇനിയെന്നു കാണുമെന്നോര്‍ത്തു വിതുമ്പി
അബലയാം പാവം അടിയാത്തി(2)
കാലനെപ്പോലും വിലയ്ക്കു വാങ്ങുന്നൊരീ
കാലത്തെയോര്‍ത്തു വിതുമ്പുന്നു ഞാനും(2)